തങ്കയം ശ്രീ സുബ്രഹ്മണ്യ സ്വാമി ക്ഷേത്രം

(ഹരി പി.പി എഴുതുന്നു)
നൂറ്റാണ്ടുകൾ പഴക്കമേറി തകർന്നടിഞ്ഞ് കാട് കയറിയ അമ്പലത്തിൻ്റെ അവശിഷ്ടങ്ങൾ...... നാട്ടുകാരുടെ നിശ്ചയ ദാർഡ്യം കൊണ്ടും ഇഛാശക്തി കൊണ്ടും നവീകരിക്കപ്പെട്ട് തങ്കയത്തിൻ്റെ ഹൃദയഭാഗത്ത് പരിലസിക്കുന്ന ഒരു ക്ഷേത്ര സമുച്ചയമായി മാറിയ ചരിത്രമാണ് ഈ ക്ഷേത്രത്തിന്നുള്ളത്........ പഴയകാലത്ത് ഈ ക്ഷേത്രാവശിഷ്ടങ്ങൾക്ക് മുന്നിലൂടെ പോകുന്ന ഏതൊരാളും പ്രത്യേകിച്ച് സ്ത്രീകൾ ഒന്നു കൈകൂപ്പി " എൻ്റെ പെരുമാളെ " എന്നു വിളിച്ചല്ലാതെ വഴി കടന്നു പോയിരുന്നില്ല ...... ഈ കാഴ്ച ഇന്നും എൻ്റെ ഓർമ്മയിലുണ്ട്.....
ശ്രീ സുബ്രഹ്മണ്യസ്വാമി, ബാലമുരുകഭാവത്തിൽ പടിഞ്ഞാറോട്ട് ദർശനം നൽകുന്ന അപൂർവം ദേവസങ്കേതങ്ങളിൽ ഒന്നാണ് ഈ ക്ഷേത്രം. നീണ്ട പതിനഞ്ച് വർഷങ്ങൾക്കു മുമ്പേ പുനപ്രതിഷ്ഠ നടന്ന ഈ ക്ഷേത്രത്തിൻ്റെ സ്ഥാപക പ്രസിഡണ്ട് യശ:ശരീരനായ ശ്രീ.പി.പി. കുഞ്ഞിരാമൻ മാസ്റ്ററായിരുന്നു.. സ്ഥാപക സെക്രട്ടറി ഇന്നും ക്ഷേത്രത്തിൻ്റെ പ്രസിഡണ്ട് പദവിയിലിരുന്നു ക്ഷേത്രത്തിൻ്റെ എല്ലാ പ്രവർത്തനങ്ങളും ഏകോപിപ്പിച്ചു കൊണ്ടിരിക്കുന്ന ശ്രീ. കെ.വി വിജയനുമാണ്. ഖജാൻജി ക്ഷേത്രത്തിനടുത്ത് തന്നെ താമസിക്കുന്ന ശ്രീ. പി.പി ഗോവിന്ദനുമായിരുന്നു.... പുനപ്രതിഷ്ഠക്കു ശേഷം ഘട്ടംഘട്ടമായ ലക്ഷ്യബോധത്തോടെയുള്ള നവീകരണ പ്രക്രിയകളിലൂടെയാണ് ഇന്നുകാണുന്ന അമ്പലം രൂപപ്പെട്ടത്....
ചുറ്റുമതിൽ നിർമ്മാണം , ശ്രീകോവിലിനു മുമ്പിലെ മുഖമണ്ഡപം, ഭണ്ഡാര നിർമ്മാണം തിരുമുറ്റത്തെ കൽ പടുതി ഏറ്റവും അവസാനമായി ചീമേനി ശ്രി. സെൽവരാജിൻ്റെ നേതൃത്വത്തിൽ ക്ഷേത്രത്തിൻ്റെ മുഖഛായ തന്നെ ദൈവിക കലയാക്കിയ ക്ഷേത്രത്തിൻ്റെ മേൽമാട് ഷീറ്റു പതിക്കൽ തുടങ്ങിയ ദേവേഛയോടെയുള്ള നിർമ്മാണ പ്രവർത്തനങ്ങൾ ........ അമ്പലത്തിൻ്റെ മതിൽക്കെട്ടിനുള്ളിൽ പ്രവേശിക്കുന്ന ഒരു ഭക്തൻ്റെ മനസ്സിൽ പോസിറ്റീവ് ഊർജം നിറക്കുമെന്നത് ഒരു തർക്കമറ്റ സംഗതിയാണ്.....
തെക്കിനിയേടത്ത് പത്മനാഭൻ ഉണ്ണി നമ്പൂതിരിപ്പാടാണ് ക്ഷേത്രം തന്ത്രി.... തൻ്റെ ഉപാസന സപര്യകൊണ്ട് നേടിയെടുത്ത ഉൾക്കാഴ്ചയിലൂടെ ഈ ക്ഷേത്രം നാട്ടിന്നു തന്നെ ശ്രേയസ്സായിരിക്കുമെന്ന് അദ്ദേഹം പ്രവചിച്ചിരുന്നു... പുലിയന്നൂർ കൃഷ്ണൻ നമ്പൂതിരിയാണ് ക്ഷേത്ര മേൽശാന്തി..... ദേവൻ്റെ നിർമ്മാല്ല്യ ചാർത്തിനും പൂജക്കും വേണ്ട മാലകൾ വ്രതശുദ്ധിയോടെ കെട്ടുന്നത് ക്ഷേത്രത്തിന് തൊട്ടരികിൽ താമസിക്കുന്ന ശ്രി. പി.വി.സുരേശനാണ്.... ഇദ്ദേഹത്തിൻ്റെ ഭാര്യ വിനിതയാണ് അടിച്ചു തളി ജോലി ചെയ്യുന്നത്.... കണക്കുകൾ കൈകാര്യം ചെയ്യുന്ന ക്ലാർക്ക് അമ്പലത്തിനുതൊട്ടടുത്ത് താമസിക്കുന്ന ശ്രി. പി.വി സത്യനുമാണ്.... തൃക്കരിപ്പൂർ തങ്കയം സാമൂഹികാരോഗ്യകേന്ദ്രത്തിൽ നിന്നും കേവലം അര കി.മി വടക്കു കിഴക്കു ഭാഗത്താണ് ക്ഷേത്രം സ്ഥിതിചെയ്യുന്നത്....
നിറ, പുത്തരി തുടങ്ങിയ പ്രാദേശിക ആഘോഷങ്ങൾക്കു പുറമെ മിഥുന മാസത്തിൽ നവക പൂജയുടെയുള്ള പ്രതിഷ്ഠാദിനം... മകര മാസത്തിലെ പൂയം നക്ഷത്രത്തിലെ തൈപ്പൂയ്യ മഹോൽസവമാണ് ക്ഷേത്രത്തിലെ പ്രധാന ഉൽസവങ്ങൾ............ കൂടാതെ നവരാത്രി ഒമ്പതു ദിനങ്ങളിലെ സൽസംഗങ്ങളും ഭജനകളും സഹസ്രനാമാർച്ചനയും ഗ്രന്ഥപൂജയും വാഹന പൂജയും ദശമി ദിനത്തിലെ എഴുത്തിനിരുത്തും കർക്കിടക മാസത്തിലെ രാമായണ പാരായണവും ക്ഷേത്രത്തിൽ ഉൽസവ ഛായ പകരാറുണ്ട് .... സ്ഥാപക സെക്രട്ടറിയും ഇപ്പോഴത്തെ പ്രസിഡണ്ടുമായ വിജയേട്ടൻ്റേയും സെക്രട്ടറി കെ.വി.മോഹനൻ്റെയും ട്രഷറർ കുറുന്തിൽ കൃഷ്ണാട്ടൻ്റെയും നേതൃത്വത്തിലുള്ള കമ്മിറ്റിയാണ് ഇപ്പോൾ ക്ഷേത്രഭരണം നിവർത്തിക്കുന്നത്.... ക്ഷേത്രത്തിന് മുതൽകൂട്ടായി ശ്രീമതി പി.യു. സുമതി ടീച്ചർ പ്രസിഡണ്ടായും ശ്രീമതി കെ.കെ. ജയലക്ഷ്മി സെക്രട്ടറിയുമായ സജീവവും ശക്തവുമായ വനിതാകമ്മിറ്റിയും ക്ഷേത്ര വൃത്തികളിൽ മുൻ നിരയിലുണ്ട് ...... ബാലമുരുക ഭാവത്തിലുള്ള ദേവസേനാപതിക്ക് സമർപ്പിക്കുന്ന പ്രാർത്ഥനകൾക്ക് ദേവൻ വിളികേൾക്കാറുണ്ടെന്നത് പലർക്കും അനുഭവത്തിൽ വന്ന കാര്യമാണ്.....
വേൽസമർപ്പണം, നെയ്യമൃത്, തൃക്കാൽ തൊട്ടു ജപം , ഐക്യമത്യ പുഷ്പാഞ്ജലി, കാവടി മുദ്ര ധരിക്കൽ, പഞ്ചാമൃതം ,തണ്ണിന മൃത്, നാഗം തൊഴൽ ദേവൻ്റെ കന്നിമൂലയിൽ വാഴുന്ന ഗണനായക ന്ന് ഒറ്റ നിവേദ്യം തുടങ്ങിയവ സാർത്ഥകമായ വഴിപാടുകൾ ആണ്.....
രോഗഭയം, വിഷഭയം , ത്വക്ക് രോഗനിദാനം എന്നിവയ്ക് കൈക്കൊണ്ട പ്രാർത്ഥനയാണ് ദേവന്ന് വേൽ സമർപ്പണം ...... അന്യ മതസ്ഥർ വരെ വിവിധ പ്രാർത്ഥനകൾ നടത്തുന്നതിനു വേണ്ടി ക്ഷേത്രത്തിൽ വരാറുണ്ടന്നതും ദൈവാധീനത്തിൻ്റെ പുണ്യം തന്നെയാണല്ലോ വെളിവാക്കുന്നത്...?
ഷഷ്ടിനാൾ പ്രത്യേകിച്ചും വൃശ്ചിക ഷഷ്ഠി ദേവദർശനം ചെയ്ത് വ്രതശുദ്ധിയോടെ ഒരിക്കൽ വ്രതം അനുഷ്ഠിക്കുന്നത് കന്യകമാർക്ക് ഭർത്ത്രു ഭാഗ്യം ലഭിക്കുന്നതിനും സത്പുത്ര സമ്പാദനത്തിനും ഉചിതമായ പ്രാർത്ഥനയത്രെ ....... ക്ഷതത്തെ ത്രാണനം ചെയ്യുന്നതാണല്ലോ ക്ഷേത്രം....? ഭക്തരുടെ മാനസിക വ്യഥകളും പ്രശ്നങ്ങളും രോഗദു:ഖ ഭയങ്ങളും ഇറക്കി വക്കാനും ഉള്ളുരുകി പ്രാർത്ഥിച്ച് ദേവപ്രസാദമായ ചന്ദനം നെറ്റിയിലണിഞ്ഞ് മനോഭാരങ്ങളെ ഇറിക്കി വച്ചു സ്വസ്ഥരാകാനും ഈ ദേവസന്നിധി ഉപകാരപ്പെടും എന്നു ആർക്കും അനുഭവിച്ചറിയാവുന്നതാണ്.......🙏🙏🙏